【本報訊】屹立旺角逾20載、前身是酒樓，經舖王「波叔」鄧成波點石成金變成街知巷聞，人稱「旺電」的旺角電腦中心將大變身，據知旺電正獲本港著名波鞋零售商允記洽租，月租約400萬元，假如成租，新租客最少月賣6,000對由碧咸代言、售價約660元的adidas波鞋才夠交租。
記者：陳家雄 陳沛冰
據了解旺電地下入口大堂及1至3樓，正獲允記洽租，月租約400萬元，但未落實簽租約，因新租客擬將該場變身「波鞋城」，要求業主改建內櫳結構，或須向屋宇署入則申請。旺電在2012年年中由禹銘集團及有關人士以10.18億元買入，總樓面約25,000方呎，有約70個舖位，呎租由約80元至逾200元，每月收租約300萬元。據了解，業主傾向租予單一租客，免麻煩外，還擬乘機轉型 。
2及3樓退租情況嚴重
記者昨下午3時多到場觀察，屬腦場非繁忙時段，旺電1樓仍人流如鯽，當中不乏外國及內地旅客，然而步上2樓及3樓，卻人流稀疏，且不乏吉舖，而以賣電腦及相關產品聞名的著名腦場，竟有看來格格不入的格仔舖。代理表示，該場2樓及3樓近年退租情況嚴重，相信是因近年電腦砌機行業式微，不少吉舖以呎租約80元招租，仍乏人問津。
對於旺電隨時消失，在場內賣電腦遊戲逾20年的售貨員梁先生表示，暫未聞業主不續租的消息，「不過你問我，我都唔會感到意外，因為波鞋街重建緊，好明顯呢度會少咗波鞋舖，佢哋都要搵舖位。呢個係好正常商業理由，租畀單一個客，冇眼屎乾淨盲。如果我係業主都會咁做」。
旺電風光一時，是不少已屆中年「機佬」、宅男集體回憶，在此工作20年的梁先生說：「感情大家都會有，有啲客，睇住同佢一齊成長，睇住佢生仔，仲帶埋個仔一齊嚟買嘢。睇住呢度起起跌跌，1997年前，賣遊戲機產品，嘩！賣得好勁。沙士時，女人街想搵個人都冇。近年自由行，我敢肯定，唔單只帶旺，直頭撐起，𠵱家舖頭一半生意係自由行。啲客由以前鬼佬為主，到今日自由行。旺角係點，我哋就會係點」。
允記1968年由陳氏家族創立，在灣仔莊士敦道起家，後來業務擴展至旺角「波鞋街」，有多個舖位，現全港有逾50家分店，員工逾500人，本報昨致電允記分店查詢，店員稱不了解租新舖事宜，負責人未有回覆。
市民心聲
莊小姐
「旺電已經開業好多年，咁多年嚟，砌機、買電腦都喺呢度，係一個時代嘅標誌，如果真係改做波鞋城，覺得可惜！」
羅先生
「需要買嘅電腦產品都可以喺旺電買到。如果呢度唔再賣電腦產品，要落去深水埗，變得冇咁方便，始終旺電有存在的價值。」
