幾乎忘記咗存在嘅細價醫藥股，呢轉癲鳳鬥狂龍，但位元堂（897）仲喺八年底未郁，講PB又係最吸引，集團啱啱上星期配股，承配人賬面head住雞碎咁多，點夠喉？
啱啱呢個星期，好耐冇郁過嘅細價醫藥股升到甩轆，銘源（233）短短四個交易日，大升60%，武夷藥業（1889）三日升咗17%。華夏醫療（8143）升33%，位元堂同期升咗5%咁大把。
位元堂殘到冇朋友
位元堂啱啱上個星期配售5.86億股，就算計埋攤薄因素，集團喺呢個八年海底價（0.22元），PB仍得0.4倍。上邊銘源同華夏PB，上到1倍樓上，精優2.5倍，武夷0.6倍，位元堂比呢批藥業股平均1.27倍PB，平咗過半。
又位元堂呢期配股，每股配股價0.186元，配股撼貨賬面數暫時凸章1,990萬元，若果等同金額，擺喺銘源度，已經凸章過5,000萬元。當然，呢個世界係冇早知，但睇到位元堂超殘未郁，兼低PB，承配人肯定唔夠喉。
仲過癮係，上次講位元堂阿媽宏安（1222），今年4月以嚟keep住增持，去到幾乎要全購30%水位。經呢次配股，宏安權益攤薄到得番24.58%。即係話，宏安又可以再落場增持位元堂，成為額外購買力。
除咗宏安，投資者Andy Wei喺上個月21號，真金白銀用咗1,150萬元，增持位元堂5,530萬股，去到11.16%。睇番Andy同宏安呢兩年最高入市成本價，係講緊0.262至0.269元，位元堂家陣潛水21%。
醫藥板塊郁，有買趁勢，當位元堂上番呢個增持成本區，係咁意要升22%，又位元堂翻半番到0.33元，PB得0.6倍，仲未追到行家平均值。
錢雋
細價股專家
本欄逢周二、三、五刊出