近日心緒不寧，寢食難安，想睇西醫又唔覺自己有病，睇心理醫生傾偈費貴過見大狀，要經濟實惠又止得咳，惟有搵中醫執番劑。去到醫館猶如浮沉大海見水泡，立即用劉以達聲線高叫：「大夫─！」豈料大夫尚未把脈，兩眼一瞟，便可斷症：「睇你苦瓜咁面，肯定鬱結難解。」嘩！大夫真神人也！「有何心結？」大夫問。
「我慘被欺騙感情！」大夫冇反應，即係默許我繼續自爆。
「是咁的，我話晒識佢十七年，由最初覺得佢老土，慢慢冇乜感覺，到後來覺得都幾cute吖，於是乎就單方面發展感情起來了？」
「最後佢飛你？」大夫叻唔切問。
「No！佢間公司想我哋繼續支持佢，儍的嗎？佢鹵味無情白事公告天下，話哈囉吉蒂唔係貓，係一個永遠讀三年班嘅英國妺？足足呃我十七年，大夫你叫我點接受到呀？」說罷仍深深不忿。
「你點解覺得吉蒂係貓？」冷不防大夫仍氣定神閒反問，我答得當然理直氣壯：「根本成個都係貓樣，有貓鬚嘅喎！」
「乜有鬚唔係你老竇咩？定有奶便是你娘？」大夫嘴角一斜，我語塞了，他再娓娓道來：「個樣似貓，只係『似』，熊貓都唔係貓啦，right？人哋係正牌出品商，話係乜就係乜，而且絕對合情、合理、合法，你哋條氣唔順係因為妄想用國際標準去判斷尖耳圓面有鬚就係貓，你話你哋係咪儍？包容吓啦！仲有，我問你，多啦A夢係咪貓？」
原地踏步盞痛苦
「……係咪即係叮噹？」話口未完大夫一巴車過來，指住我然後話：「你呢啲咪就係叫原地踏步，仲停留喺以前嘅證明囉，叮噹！人地改用原名好耐喇，所以話，逝去嘅愛情仲死攬住唔放咪盞痛苦……喂你仲未答我，多啦A夢係咪貓？」
心諗追咗咁多年，點會答錯？於是堅定無比地回答：「係！」
大夫再指住我個鼻，然後話：「錯！多啦A夢極其量係機械貓，既然機械人唔算係人，咁機械貓點可以係貓呢？醒吓啦！」
聽罷我不自覺流了兩行眼淚，那被吉蒂欺騙的鬱結一掃而空，我覺悟了，原來答案都在多啦A夢！
你看這頭機械貓的特徵：肚皮上的口袋，淺得不能藏物，只可「袋住先」；每逢有爭執大雄都必定說猜包剪揼決定，表面畀足機會，但其實心知肚明它那隻像圓球沒有手指的手永遠只能夠出「揼」，是永遠的欺騙。
原來我們都是多啦A夢。
【一言棠】
撰文：歐錦棠
除表演藝術，也酷愛文字、影像及武術，其文章往往一針見血。
本欄逢周五刊登