阿爺企硬落大閘，2017年普選行政長官續由小圈子提名，500萬選民no say，京官護法肉麻當有趣，仲講埋甚麼「提委會是塊美玉，越看越可愛」、「中央是香港最大的民主派」等風涼話，盡顛倒是非，令人哭笑不得。
泛民反晒枱，方案獲立法會通過機會唔大，特首由我哋揀不但變得遙不可及，恐怕2017年連票亦無得投。縱使筆者比較stubborn，認為投選票同投鈔票是兩回事，深信市場最能反映個人意向，所以一直對少數服從多數嘅所謂民主唔係咁熱衷。不過，近年目睹本地領導、京官以至俄羅斯總統普京滿口語言偽術，越來越覺得言論自由嘅可貴、民主社會好嘅一面。
以黑海危機為例，俄軍一直係背後搞烏克蘭路人皆見，但普京就賴皮唔認，就算面對歐美制裁表現亦反覆無常，嗰頭拋浪頭話兩周內可直搗基輔，隔日（本周三）又話跟烏克蘭傾掂數，烏克蘭東部有望停火，但話口未完普京又捉字蝨，話俄羅斯從無介入烏國局勢，停唔停火同俄國無關，視誠信如無物。尤幸大家對其反口覆舌嘅言論見怪不怪，金融市場當日未被舞高弄低。
環顧本周滙市，歐美經濟繼續背着走。美國數據靚，有加息憧憬，說美元是「一塊美玉，越看越可愛」絕對貨真價實。以8月工廠定單為例，10.5%的增幅前所未見，聯儲局新一期褐皮書亦顯示，當地經濟持續溫和增長。反觀歐洲一池死水，歐元區7月零售跌0.4%，製造業表現逾一年最差，8月CPI僅升0.3%，創逾五年低位，龍頭德國嘅經濟亦呈敗迹。執筆時歐央行未出議息結果，唔知有冇料到，但歐央行應該唔拖得幾耐，加上聯儲局下月停買債，歐元要翻身殊不容易。
蘇格蘭公投 英鎊趁低吸
歐美貨幣政策背馳下，美滙指數本周突破83，創14個月新高，歐元曾到1.31美元邊，德拉吉昨日若爆半冷出招，恐怕要下試1.3算。不過，歐元過去兩個月已下跌約600點子（約4%），加上淡倉處於兩年高位，若然昨日議息冇料到，歐元有條件技術反彈。
市場憧憬日本改革退休金投資策略增購海外資產，刺激美元兌日圓周三抽上105.31，差少少創六年新高。聯儲局本月17日議息前，美元料保持強勢，但下周主角可能是英鎊，事關蘇格蘭本月18日將公投表決是否脫離英國，民調顯示主張維持現狀的民意仍佔先，但支持獨立的比率近期正在增加，是英鎊近期積弱、昨日跌至1.6437美元半年新低的原因之一。翻查資料，英鎊和歐元相比2008年高位，分別仍低19%及18%，但從經濟及息口前景角度，英國遠比歐洲理想，今次可能是低吸英鎊的良機。
奇兵
本欄逢周五刊登