憑住短篇電影《三輪車伕》捱出頭嘅梁健平，嚟緊呢套戲會參加第39屆多倫多國際電影節，角逐最佳短篇電影，日前梁健平去咗澳門，應導演梓龍（Maxim Bessmeryny）邀請，同成班工作人員提早慶功，預祝出戰順利，梓龍仲帶咗佢爹哋親手畫嘅電影海報，當係禮物送畀啲演員！
扮相滿臉鬍鬚
話晒都係男主角，嗰日梁健平喺澳門有唔少人搵佢影相，講番拍戲嘅情況，佢話：「嗰陣我去完廁所後咪沿路離開，突然有位保安大聲喝我，原來係我行錯路，事後諗番可能自己當時嘅外形係滿臉鬍鬚嘅三輪車伕，對方先咁嘅態度，證明我夠晒入戲。」
至於入圍感受，導演梓龍話：「能入圍已經相當鼓舞，我抱觀摩心態參與，如果有機會都想參加其他國際電影展，我都希望將呢套電影帶嚟香港，畀香港觀眾欣賞。」另一位演員李蔭良（Aeson）話今次係好好嘅人生經驗，佢仲笑話：「演員生涯太辛苦，我唔會再拍戲，要我放低盤生意十幾日仲辛苦。」
撰文：馮仁昭