近幾年，講起可以爭大賽冠軍嘅歐洲隊，不外乎西班牙、德國、意大利同荷蘭，甚至唔少人會提比利時，話呢隊波成隊英超人，可以做黑馬。至於法國，似乎自從施丹退役後，就由爭標分子變成志在參與，但喺嚟緊呢屆歐國盃，法國絕對值得期待。
喺呢幾隊歐洲強隊入面，西班牙世盃遭逢慘敗，要大換血，同時要放棄用咗4年嘅巴塞隆拿式踢法；雖然人才儲備夠，但新人同新戰術可唔可以融合都係疑問。意大利除咗換教練外，最緊要係派路越嚟越老，至今都未搵到一位接班人。荷蘭嘅3大主力尹佩斯、洛賓同史奈達漸有老態，但未見有具級數小將冒起；只有德國兩年後仲可以用呢班主力，而且仲當打。
同西、意、荷唔同，法國喺世盃後變動好少，亦唔需要喺呢兩年間改朝換代，可以沿用同一班主力參戰，其中大部份球員仲係20出頭，兩年間會更加成熟。華拉尼同埋保羅普巴今年只係21歲，喺世盃已經有大將之風，相信兩年之後，佢兩個會更加有實力，加埋文加拉、基沙文同埋馬馬度沙高，呢班新人應該可以喺歐國盃有出色表現。法國仲有一班當打得嚟又有經驗嘅老大哥，賓施馬好似出道咗好耐，其實都係26歲，加上28歲嘅卡比耶做中場指揮官。兩年後，「高盧雄雞」有望成為德國嘅最大敵人。文：咖喱
識睇，一定係睇足英台【英波Live】：
http://soccer.appledaily.com
http://bit.ly/engballlive