大家仲記唔記得之前有單報道話，馬會有感於亞視未必獲得續牌，故有意將皇牌節目——賽馬，都俾埋大台搞？(新聞連結: http://bit.ly/1tuUdTA )。其實由去年開始，nowTV同有線都已經可以播賽馬，分一杯羹，令亞視班sales已十分頭痛，依家可能仲煩，因為分分鐘連六合彩都冇埋！
昨日有報道指，都係因為有可能亞視不獲續牌呢個不明朗因素，故亞視或不再獲六合彩播映權。六合彩之子蔡國威BB坦言都有聽過呢個傳聞，仲話:「有聽過無綫係做standby，家寶(亞視執董葉家寶)都同我哋講，一切要睇續唔續到牌。我就唔擔心。」
其實亞視播六合彩都試過幾次蝦碌，又出錯又盛，令有關方面好唔滿意。如果真係連六合彩都冇埋，咁「香港人唔可以冇咗佢」嘅亞視會否積極考慮重推《魚樂無窮》或者夏春秋主持嘅「當年今日六合彩」以挽收視吸廣告(如適用)？
葉家寶昨日喺大埔總台出席「2014電視節目欣賞指數調查」祝捷會，當然畀傳媒追問啦，佢就話：「傳聞嚟啫，同馬會係長期合作，只不過因為有啲續牌嘅關鍵，馬會都做緊一啲準備功夫，嚟緊呢一季嘅賽馬同六合彩都會喺亞視，係免費電視播出嘅唯一平台。」