美國駐港總領事夏千福（Clifford A. Hart）去年嚟香港履新後，經常微服出巡了解民情，獲唔少市民爆like當做民間特首！因為人氣高、民望好，阿爺當然睇佢唔順眼，覺得佢另有所圖，有建制派中人同八方講，千福BB今年5月中聯同其他七國領事到訪深水埗「惜食堂」，恍如「八國聯軍」出動嘅姿態，激到阿爺紮紮跳，甚至連人大委員長張德江都「怒不可遏」喎！
據聞北京一直都唔妥千福BB咁高調，覺得佢嚟香港係搞事。但若然要數令中央最嬲嬲豬嘅一次，八方聽聞係今年5月嘅事。話說千福BB當時率領英國、日本、加拿大、澳洲、新西蘭、印度同德國等七國領事，拉大隊殺入深水埗惜食堂，幫手整飯盒派畀香港嘅弱勢社群。
千福BB吹雞號召領事出動，雖然係做善事，但看在中方眼中，卻形同百幾年前八國聯軍侵華事件，係歷史嘅傷口。雖則千福BB等八國領事，同當年英、法、德、美、日、俄、意、奧不盡相同，但建制中人話，對北京嚟講，姿態同樣具挑釁性，而英國駐港總領事館事後喺facebook貼嘅「八國聯軍」照片中，仲見到唔少領事攞住把刀，試問成日覺得外國勢力搞亂香港嘅阿爺，睇到點會唔㷫？
急推一國兩制白皮書
有建制中人話呢一幕令包括張德江在內嘅京官好嬲怒。唔知係咪喺北韓金日成綜合大學讀過書，令張德江對美帝所為特別肉緊，據聞事件令佢更決意盡快推出一國兩制白皮書，警告外國勢力，畀啲顏色千福BB睇。
李八方
mailto:[email protected]