冇颱風嘅暑假剛剛結束，唔少人都好懷念打風唔使返工嘅日子。互聯網搜尋器雅虎香港公佈今年5至7月最多人search嘅十大颱風名，舊年號稱1950年以來最強、結果「勁」到影都冇嘅颱風「天兔」排第一，緊隨其後嘅亦都係舊年嘅颱風「尤特」，排第三嘅則係1962年吹襲香港、史上最強勁嘅颱風「溫黛」，當年造成近180多人死亡、53人失蹤，傷亡好慘重！
而打風落雨做乜好？雅虎發現此時最多人上網搵嘅係「食譜」，唔通趁打風期間玩煮飯仔，味道更好？第二位則係國泰航空，理由大家都估到；第三就有啲特別，竟然係香港駕駛學院，反映香港唔少人都學車。