對於唐牛嚟講，噚日最震撼嘅消息，唔係港股再創逾六年新高，唔係中移動（941）重上紅底，而係有內地報章竟然介紹強國人嚟香港踢波！香港炒場問題情況非常嚴重，一個原本只係百零蚊嘅場，可以炒到六七百蚊，都仲要爭崩頭。如果本港樓市要靠辣招壓需求，相信球場會成為下一個犧牲品。
中港旅業發展空間大
「I don't believe it，是我放棄了妳……」優客李林嘅認錯，無人不曉，唱呢首歌，係為咗早前短線轉做淡友認錯。馬後炮檢討，有兩個關鍵位出錯。第一，佔中問題發酵程度比預期中溫和；第二，忽略咗港滙強橫程度。之前講過，近期防守股表現勁到無倫，話唔定係海外資金沽債換股嘅結果。一場嚟到香港，見到啲股票咁平，就好似大家平時去759咁，呢樣買啲嗰樣買啲，結果造成百花齊放嘅局面。
大市喪升，個股走勢大同小異，講嚟到冇意思，所以講下冷門股冠忠巴士（306）。除專營大嶼山巴士線外，業務還包括非專利巴士出租服務，以及中港旅遊及酒店服務等。早前大股東向家族基金及新世界系，以每股2.3元購回股權，兼觸發全面收購，經過一輪減持後，現時兩大股東持貨71%。大股東突然收回控權，究竟諗緊乜？中港旅遊業已二合為一，加上港珠澳大橋興建在即，公司業務其實大把發圍空間，現價PE 7.5倍，兼有4厘息墊底，又確實好平，噚日一度飆升兩成，唔通就係大炒嘅前奏？
唐牛
https://www.facebook.com/tongcow88