曼聯喺今季嘅夏天轉會市場，斥資1.5億鎊簽6個球星返嚟，但就仲未夠喉，消息話佢哋諗住喺1月冬天轉會市場重開時再使多5,000萬鎊，務求要將荷蘭中場史杜特文同埋德國中堅曉姆斯搶到手，以增強中後場實力，執一執隊波要2億鎊（約25.6億港元），認真誇張。
曼聯上季成績勁差，只係得第7名，今季搵雲高爾嚟教，就係要重建球隊。喺今個夏天，佢哋豪花1.5億鎊入咗批球星，分別係迪馬利亞、安達靴里拉、勞基梳爾、馬高斯盧祖、戴利白蘭特同埋法卡奧，前面搞得七七八八，但後面仲要執。來自奧脫福嘅消息人士表示，佢哋會喺明年1月嘅冬天轉會市場再買人。據聞雲高爾唔係太滿意紅魔中後場嘅實力，所以想以2,500萬鎊簽羅馬嘅荷蘭中場史杜特文。
傷膝RVP否認做手術
現年24歲嘅史杜特文係雲高爾嘅愛將，可惜今年3月膝部重創搞到踢唔到今夏巴西世盃決賽周，預計要到秋天先至可以復出。消息話只要佢完全好番，雲高爾就會帶佢去夢劇院。史杜特文經理人迪卡話：「雲高爾對史杜特文好有興趣，但呢一刻佢同曼聯就未扯上任何關係。」除咗史杜特文之外，雲高爾都諗住喺冬天時買埋多蒙特新任隊長曉姆斯，但多蒙特唔願放人，睇嚟紅魔至少要出價2,500萬鎊先有數講。
另外，有指曼聯突然用600萬鎊同摩納哥借用法卡奧1季，係因為尹佩斯（RVP）個膝頭要做手術，但RVP否認真有其事，話自己唔使開刀，只要唞夠就冇問題。摩納哥今夏將占士洛迪古斯賣畀皇家馬德里，家陣連法卡奧都借埋畀曼聯，陣中冇晒球星，搞到買咗季票嘅球迷勁不滿，要求回水。與此同時，曼聯趕及喺夏天轉會市場關閉前，將陣中嘅英格蘭中場湯卡華利借畀阿士東維拉，連埋韋碧克、查維亞靴南迪斯、拿尼、韋費特沙夏同香川真司等人，雲高爾上場後踢走逾半打球員，果然係幫紅魔改朝換代。
識睇，一定係睇足英台【英波Live】：
http://soccer.appledaily.com
http://bit.ly/engballlive