呢排泛民主派人心惶惶，因為由壹傳媒集團主席黎智英嘅私人電腦密件流出，足以反映中共出動咗全副機器，竊取泛民嘅機密資料，務求打擊或抹黑泛民！而喺呢個敏感時刻，泛民中人亦留意到，不時都會收到古怪電郵。
好似人民力量慢必咁吖，原來佢最近收到一個下款為「Emily Wong香港大學政治與公共行政學系」嘅電郵，自稱為學生嘅Emily Wong話，進行緊百大香港政治人物專題網站，聲稱網站上有對慢必嘅簡介；為謹慎起見，希望慢必click入一個連結睇睇有冇問題。點知慢必卻發現，若然按指示click入，電郵密碼就會被盜取，呼籲其他泛民，小心中伏！