上星期平機會同歐盟搞咗個研討會，請咗班歐洲官員同學者，分享佢哋同志平權立法之路，性傾向條例家校關注組當日踩場，負責人黃偉明（Roger）喺現場質問滙豐香港人力資源部主管Tafline Yew，點解會為同志員工提供伴侶福利，話滙豐用佢小股東啲錢嚟支持同志運動。
本身做moderator嘅英國駐香港及澳門總領事吳若蘭聽到呢度，忍唔住回應，「你大可以賣掉你手上的滙豐，反正她站出來撐同志，股價卻漲了很多」。現場個個聽到拍爛手掌。
唔知Roger係咪畀人笑到面黃嬲得滯，噚日寫信去平機會投訴吳若蘭，話佢唔應該搶答問題。
八方噚日同Roger通電，問佢係咪滙豐股東，佢初時話有買過，不過已經賣晒，之後又話間接有買，因為好多基金都包含滙豐，再之後就話「你當我有啦」，咁即係有定冇呢？然後佢就話「屋企人有」，仲叮囑八方呢個唔係重點，叫八方唔好寫。咁究竟老作大罪，定搶答問題大罪呢？