有線娛樂台真人騷《十萬蚊港女大翻身》日前到韶關拍攝，並且請咗近日蜜運中嘅趙碩之做嘉賓，6位參賽者先後喺溫泉中以身體玩夾生果、摔角球賽、鬥快食蟲等鬥智鬥力鬥膽量嘅出位遊戲。
「真係難飲到嘔！」
為爭奪10萬蚊獎金，港女Jasie、In Lee、楚嵐、Ruby、Michelle、Omi就算着住比堅尼喺溫泉玩遊戲都完全無避忌，手口兼胸口並用，甚至咀嘴、胸頂胸。喺蓮花池進行摔角球賽時，一班港女更唔理泥水撲面箍頸、扯頭，表現極度凶狠。其間是非精Jasie被推跌搞到連飲兩啖泥水，Jasie即場作嘔：「真係難飲到嘔！」
除咗鬥體力，仲要鬥大膽食昆蟲，數量更係一口氣要食幾十隻，幾位港女食到反胃，原本食蟲最落力嘅Michelle一口氣食咗20隻蟬，最後因為隊友Omi齋睇唔食而拖累輸咗比賽，Michelle話：「都冇辦法，大家都盡咗力。」趙碩之為呢個港女比賽做評判，佢話：「諗番起自己做新人，當然曾經俾前輩話我唔識做人。」
撰文：馮仁昭
