港股噚日勁升500幾點，成交破千億元，但升嘅主要係藍籌，未見雞犬皆升嘅地步，但中廣核礦業（1164）大放異彩，未見原因下勁升逾一成。收市後路透社就將一切謎底解開，報道指中廣核電力已向港交所（388）申請上市，集資額20億美元（約156億港元）。
中廣核上市風吹了又吹，今次終於來得實在。中廣核為內地最大核電集團，其在運核電裝機產能達1,162萬千瓦，超過全國總量一半，目前最大項目為座落深圳龍崗區的大亞灣核電基地。今次中廣核正正就係打包核心資產，亦即核電業務上市，你話唔轟動都好難。要炒影子，中廣核礦業一定係第一隻！首先，中廣核上市前，系內公司相信會有一輪重組活動。中廣核持有中廣核礦業逾半股權，後者自然「叮」一聲，冠上「重組概念」光環。
今年中廣核礦業獲母公司注入位於哈薩克兩鈾礦山股權49%，另加包銷兩礦山鈾產量49%。中廣核礦業包辦開採、包銷，未來母企想買乜鈾原料相關資產，估計都會撥入中廣核礦業旗下。國務院最近強調要在今明兩年推進多項工程，唔好忘記佢阿媽係內地最大核電集團。中廣核礦業就算唔撇除資產，純以目前市值28億元計，只係佔今次上市集資額18%。多得隻股早前調整過，於重組憧憬下，而家追都仲來得切，入定貨等食糊吧。
Fifi
http://www.facebook.com/lovefrystock
本欄逢周二、四刊出