教育局局長吳克儉噚日出席香港鐘錶展，並隨貴賓團參觀，太子珠寶鐘錶主席鄧鉅明見高官駕到，即刻拉吳克儉上台，一齊主持開幕禮，結果出現一幕拉扯鏡頭。
吳克儉好似覺得唔係幾好意思，扭扭擰擰咗一陣，最後大會主持公開話請吳克儉上台，佢先至肯一齊進行剪綵。
一套三隻陀飛輪賣2,340萬
今次鐘錶展展示多個品牌最新表款，大會請嚟一班靚女Model佩戴，最矚目一款，算係價值780萬元嘅迪菲倫（DeWitt）陀飛輪手錶，鑲配17卡鑽石。鐘表商仲要求客戶一買就買一套，即係買三隻，盛惠2,340萬元！大拿拿二千幾萬，真係唔係咁易買得起喎！