末代港督彭定康都為香港出嚟講句公道話，舊人舊事總令人懷念。除咗肥彭，伍詠薇1989年參選亞姐時嘅言論亦同樣令人回味。
有網友近日share咗伍姑娘當年選亞姐時問答環節嘅片段，伍姑娘當時話，如果佢做特首，一定會加高香港嘅河壩、挖深香港啲井，令到河水不犯井水，呢個答案連民主女神余若薇都拍掌叫好！
做特首會「河水不犯井水」
短片可見當年只得廿歲嘅伍姑娘，年少無忌，面對黃霑、鄧梓峰、陳輝虹三位司儀問佢如果係首屆特首，第一件事做乜？伍姑娘笑住諗咗幾秒話：「如果我係第一屆行政首長，我會首先將香港嘅河壩提高，將啲井挖深啲，即係河水不犯井水。」連黃霑都大讚佢嘅答案「好厲害！」余若薇噚日都分享呢條短片，佢話伍姑娘呢個答案，好值得今時今日分享，支持我衞我城，「我哋要拒絕袋住先，就係要拒絕大陸化，當年（伍詠薇）話起高河壩，挖深啲井，都係一樣道理」。