8月27日本欄講巴黎治安不靖，到巴黎旅遊觀光，要認真小心。秘書V睇完，對左丁山講：「我一個朋友剛去完巴黎返嚟，佢話巴黎周街見老鼠，不少街道都有臭味，要掩鼻而過，唔知巴黎浪漫在邊一度喎！」
然後大記者當日來短訊：「朋友一家三口去法國旅行，在機場坐火車入巴黎，快到火車站之前，有人在旁邊跌了東西，跌到一地都係，兩夫婦一時好心，彎低身幫手在地上去執番一部份，到抬番起頭坐番直，老公座位旁邊嘅背囊已經失了蹤，內有美元現鈔信用咭及三人旅行證件，當堂為之欲哭無淚，到了巴黎，不是遊覽美食，而是報案，補辦證件，未玩過已經嬲到坐飛機回港。」哎吔，後來得悉，呢位好心男士喺傳媒界知名度甚高嘅！
巴黎通街有人打遊客主意，已不是新聞，遊客有時做好心不得。肥仔K在倫敦讀書之時，曾與同學到巴黎作周末遊，就在羅浮宮外，有不少人合作搵食，一對美國青年情侶見有十歲八歲小童仆低在街上，好似起唔到身，於是走埋去幫手，小童話好痛，三人傾偈之時，已另有中童行埋去伸手拉開美國女士嘅手袋拉鍊，肥仔K啱啱行過，大喝一聲，What are you doing？美國情侶抬頭一望，中童與瞓街小童已飛奔而去。
但巴黎畢竟係一個大名牌，世人旅行，唔去一趟巴黎始終心有不甘，如中國人一句話：「不到長城非好漢！」林奮強在8月28日嘅記者招待會上講黃金五十之回顧與預測，就曾講到倫敦、紐約、巴黎係世界大名牌，總之任何製品，即使物料、手工及品質與亞洲貨差唔多，但一掛上巴黎名店牌子，就可以賣貴十倍八倍，故此佢引伸到，香港已是亞洲一級名牌，有資格（在金融上）與倫敦、紐約並稱紐倫港，應該在其他服務業不斷改善，同樣達到倫敦、紐約、巴黎嘅一級聲譽，讓全世界遊客以到香港為樂。如果做得到嘅話，香港有一樣嘢肯定勝巴黎嘅呢，就係治安極好與工作勤奮精神，過去幾年，法國人來港數目不斷上升，來了就不回法國，索性在香港打工創業，其中以四十歲以下人士較多，上環、蘇豪地段碰口碰面都係。法國新上任經濟部長Macron只有36歲，本是賓架，一上任就話要考慮延長法國人標準工時（自2000年起，每周39小時降低至每周35小時），吸引外來投資，法國工會梗係唔啱聽啦。香港張建宗又啱唔啱聽呀？