大孖沙陸續交棒，今年62歲嘅信和置業（083）主席黃志祥，早年已部署接班，將香港及新加坡兩地嘅上市公司，交託第二代打理。長子黃永光已成為信置執董，管香港業務，新加坡業務就畀次子黃永龍（David）負責。比較少喺香港露面嘅David，噚日出席尖東商場活動，唔知係唔係有機會撈埋香港業務呢？
先講講個活動，信置同澳洲旅遊局合作，喺旗下尖東嘅尖沙咀中心、帝國中心兩個商場推廣澳洲菜，噚日仲安排咗一張長桌，邀請過百位嘉賓排排坐食lunch，當中有名廚幟哥、名模楊崢、「Mr.羅便臣」河國榮等等。
David話一向好鍾意澳洲，去過好幾次，仲透露下年3月會同屋企人一齊去，諗住輕輕鬆鬆度假喎。佢仲好醒目咁主動講吓自己喺信置嘅職位，好謙厚咁話跟緊其他阿哥阿姐學嘢，𠵱家嘅title只係主席行政助理。至於業務發展，佢話日前信置夥華置（127）奪得市建局觀塘項目，係因為睇好呢區，「睇好觀塘，唔係投資嚟做乜呀？」