香港竟然冇得做iPhone 6首批發售地區？話說數碼通（315）總裁黎大鈞噚日喺全年業績會，不斷畀記者同分析員追問幾時有得賣iPhone6，正當大家以為一向牙擦嘅黎總會用「唔擔心」、「好樂觀」之類嘅措詞回答之際，竟然講咗句令果迷震驚嘅說話：「就算遲都唔會遲好耐……但我諗冇乜impact啫，遲啲早啲都係有心就可以買到。」
回收價或受影響
你話香港果迷唔擔心就假，因為炒iPhone已經係香港人一年一度嘅盛事，唔少人都會借呢款「既必賺、又保值」嘅蘋果產品賺返少少生活費，如果突然遲咗，就等於少咗一個賺錢嘅機會。
加上中移動（941）董事長奚國華早前言之鑿鑿咁講，首批發售iPhone 6係「必須的」，即係話大陸唔會再好似以前咁缺貨，令唔少炒家除咗要擔心回收價冇以前咁好水位，仲要驚埋內地早開賣過香港𠻹。
市場盛傳，iPhone 6會喺9月19日正式發售，中國極可能成為首批開售地區，有業內人士同華華講，蘋果一向唔會同電訊商透露具體發售日期，只會講供貨數目同金額，所以有冇得成為首批開售地區，只可純粹靠估。過去兩代iPhone（5及5s），香港都係首批全球發售地區，覺得黎總今次只係求其答，唔代表香港冇得首批開賣。佢又話，蘋果CEO庫克生意為上，加上過去兩代iPhone（iPhone 5s/c和iPhone 5）喺香港大賣，估佢唔會無端端延遲香港呢個iPhone滲透率極高嘅市場喎。
李華華
mailto:[email protected]
