歐洲主要聯賽暫停，國際賽又未開打，但唔代表冇勁嘅足球戲碼，周一意大利羅馬就舉行一場名為「和平比賽」嘅慈善足球賽，由教宗方濟各同前國際米蘭隊長辛尼迪牽頭，雲集馬勒當拿、巴治奧、施蒙尼、舒夫真高等名宿外，又有保方、迪比亞路等現役球星落場，現役阿根廷球王美斯，原本都應承參加，不過喺周日西甲受傷，搞到佢未能披甲，好在阿根廷老球王馬勒當拿夠晒義氣，打足全場之餘，又交出靚助攻畀巴治奧入波。不過老馬、巴治奧一方似乎年紀稍大，亦都發晒福，由舒夫真高、施蒙尼領軍嘅白隊，就以6:3贏咗，當然勝果唔重要，最緊要係籌到善款畀有需要嘅小朋友。
講起兩軍教頭都好有份量，分別係阿根廷教練馬天奴同阿仙奴領隊雲格。雲格唔理轉會市場就關閉都嚟到羅馬幫手，唔知係唔係羅馬手機通訊唔係咁好，搞到佢聽錯咗助手報價，唔係邊有理由用1,600萬鎊買韋碧克㗎！
識睇，一定係睇足英台【英波Live】：
http://soccer.appledaily.com
http://bit.ly/engballlive