李怡「蘋論」（8月27日）引述學術大師之言：
「國學大師牟宗三曾經說過：『30歲以前不相信社會主義是沒出息，40歲後你還相信社會主義，你就是沒見識。』據傳羅素也說過類似的話：『一個人30歲以前不相信社會主義是沒有良心，30歲以後還相信就是沒有頭腦。』」
肥仔K呢位80後睇完，對左丁山講：「我冇良心，又沒出息，怎麼辦？」左丁山聞言，為之失笑。佢自第一日去美國讀書起，左丁山就送佢一本海耶克嘅「到勞役之路」，佢最初話讀得好辛苦，本書有好多英文生字，內容又唔多明白，但後來佢選修幾科社會科學導論之後，發覺政治學教授講課最有趣，決定主修政治，美國教授係中間偏左派，屬美國自由派，但亦鼓勵學生讀一啲「保守派學者」嘅書，（肥仔K後來發現，交paper如果多引用、贊同保守派意見，與教授取態不一致，就會攞到低分，此亦是古今中外學府不易之理，非常現實），故此肥仔K再讀「到勞役之路」，呢次一讀就入迷，好快就變成一位20歲前沒出息、無良心嘅學生咯。何況課外讀物還有Machiavelli嘅The Prince！
牟宗三先生在新亞教書時，不時在新亞周會演講，每講到時事政治，就會狠批共產黨，有一次佢大罵楊振寧返回北京，稱楊振寧等知識分子為「幫閒分子」，直情講到七情上面，開口不能自休，過晒周會時間，「誠明堂」內竟然沒有幾個學生離開，奇蹟也。有咁嘅大師在，當年嘅新亞學生相信社會主義者只是很少數。
左丁山自小「沒出息，沒有良心」，好彩還有少少「頭腦與見識」。好記得1997之前，曾訪問一位年過50歲嘅民建聯重要人物（現今名人），問佢：「你聰明絕頂，邏輯推理令人嘆服，為何至今仍然相信社會主義，支持共產黨信念？」呢位名人答其他問題快而準，答呢條就帶人遊花園，答咗等於冇答。呢個問題左丁山經常記在心頭，譬如李飛，樣貌似足飽學之士，教授級人馬，但點解以佢咁嘅年紀，仍開口埋口講埋晒一啲似是而非嘅政治道理呢？又有清華北大教授政治學者到香港罵民主派，任佢地口沫橫飛都係中央、黨的框框，令人懷疑佢地讀書咁多，究竟有冇真心真意研讀過西方政治理論及政治現實？文天祥云：讀聖賢書，所為何事？內地學者大官大概不讀牟宗三，不識羅素，故此40歲以後還是相信社會主義也。