上市公司每年都要搞股東周年大會，好多小股東都會趁機同公司管理層交流吓。好多公司會揀喺中環、金鐘一帶嘅酒店開股東會，貪佢夠就腳。不過，遠東酒店（037）就好似生人勿近咁，噚日竟然喺長洲開股東會，唔通因為全年業績見紅，唔敢見股東？
遠東酒店過去十幾年都喺總壇中環遠東發展大廈開周年股東會，但今年就改咗去旗下長洲嘅華威酒店，要班股東搭車又搭船，隨時未開會已經暈晒船浪。
雖然港交所（388）冇規定上市公司要喺邊度到開股東會，但都有個指引畀佢哋，就喺「股東大會應選擇在方便大多數股東能夠出席的地點和時間舉行」。遠東酒店今次開股東會地點都唔算「隔涉」，好似宏霸（802）同中盈（766）就分別試過喺馬來西亞同埋中緬邊境搞股東會。