剛剛擊敗傑志捧走社區盃嘅南華，噚日舉行季前記招，會上足主張廣勇除向陳肇麒、摩拉、保贊同謝家強，4位由教練團選出嘅社區盃MVP派額外2,000蚊獎金外，仲宣佈山度士重返少林搞青訓，希望不久將來可以培訓接班人喎。
南華周日喺社區盃成功打響頭炮，我求大俠都有捧場，少林兵全隊踢得好有朝氣，體能仲唔錯㖭；「油王」足主張廣勇當然識做，噚日加碼派獎金。記招上更令球圈振奮嘅，就係呢間本地龍頭球會決定加強青訓，搵咗車路士足球學校（香港）總監山度士合作，由佢哋接手南華青訓，安排岑國培、潘文迪、陸冠邦同潘耀焯幾位前南華球員，負責訓練14、15、16同18歲青年軍，出戰足總賽事。
車仔學員將代表南華
綽號少林寺嘅南華，近年因為羅傑承做咗足主後，青訓冇乜被重視，今季唔同灣仔區議會合作，隨即同昔日南華名將山度士傾，雙方一拍即合。13歲已經踢南華青年軍嘅山度士，18歲開始踢甲組，98年踢到31歲開始落山轉會好易通，𠵱家闊別16年後重返母會，山sir當然開心：「南華各組別青年軍會用晒車路士足球學校嘅球員，我哋有個平台可以長遠培訓青年軍，甚至踢上甲組；我哋上年攞咗好多青年賽事冠軍，希望今季都可以幫南華交到好成績。」
另外，張廣勇透露，港超聯球會今日再開會傾電視直播，由於下星期就開鑼，時間唔多，希望可以盡快落實。話香港冇咗佢哋唔得嘅ATV，噚日爆料話3月已同足總傾，條件平過now TV一半，仲話只係收番成本價喎，呢招賤物鬥窮人，又睇吓益唔益到香港人。
識睇，一定係睇足英台【英波Live】：
http://soccer.appledaily.com
http://bit.ly/engballlive