呢個世界真係無奇不有！華華聽講，最近內地有隻好鬼cute嘅「熊孩子險」，原來係屬於監護人責任險嘅一種，針對細蚊仔嘅破壞力帶來嘅影響，而推出嘅財產險。
其實內地保險公司為咗招攬生意，真係將「創意」發揮到極致，早排市面就見到有「蜜月意外懷孕險」、「世界杯遺憾險」、「火鍋燙傷險」同埋「霧霾險」，如果對另一半或者係自己唔夠信心，咁就可以考慮下「防小三險」。
咁多古靈精怪嘅保險，係咪真係有市場？有報道道話，平保（2318）去年針對單身人士推出一款「脫光險」，只要買咗呢款產品嘅客戶喺指定期內註冊結婚，就可獲得結束單身嘅蜜月禮金。聽講，當時唔使10分鐘就已經全部賣晒！
不過，中保監對於呢類產品就唔多buy啦！今年6月，中保監就下發通知，話會加大對違規開發「帶有博彩性質」保險產品嘅保險公司嘅處罰力度喎！