房祖名因涉毒被捕，𠵱家正扣押喺北京東城區看守所待審，作為佢老竇嘅成龍雖然傷心，但工作依然要做。噚日內地有傳媒報道話影到成龍出現喺河北省嘅木蘭圍場壩上影視基地，因為再過幾日，佢同范冰冰合作嘅西片《絕地逃亡》（Skiptrace）就會喺呢度開機，導演係Renny Harlin，噚日着住件大軍褸嘅成龍同工作人員到影視基地開會，見佢個樣好滄桑咁。
林鳳嬌以淚洗面
其實前日曾志偉都提過成龍同林鳳嬌近況，話成龍叫朋友唔使擔心佢，自己會繼續做硬漢，工作會繼續做，不過佢老婆就為個仔感到心痛，兩公婆見面都冇嘢講，老婆淨係喊！馮仁昭聽到成龍北京嘅朋友講，話成龍除咗幫個仔請律師外都唔知仲可以做乜，佢只係心痛個老婆為祖名成個落晒型兼茶飯不思。
至於成龍因為一早答應咗演出呢部西片，佢想喺呢段時間陪吓老婆都唔得，因為部戲最少都要拍3個月，不過期間祖名上庭，成龍點都會抽時間返北京見吓個老婆，同埋去探吓個仔，反正河北同北京咁近。
撰文：馮仁昭