到底巴洛迪利好啲，定蘇亞雷斯好啲？不妨將他們當係層「樓」嚟比較。先比投資價值，翻查兩個「單位」成交紀錄，曼城當年買入巴神要2,400萬鎊，轉投AC變成1,900萬鎊，到紅軍接貨只需1,600萬鎊，4年貶值3成；但阿蘇二手價由阿積士從格羅寧根以750萬歐元買入開始，轉手紅軍暴升至2,280萬鎊，巴塞再不惜追價至7,500萬鎊入貨，7年內價位暴升10倍！好明顯阿蘇係比強國人買貴晒既九龍塘豪宅，長追長有；巴神頂多係東京樓，唔似會升得番當年爆煲高位。咁好似阿蘇抵買好多。
跟住比「付款方式」，但此「款」非轉會費，而是紀律罰「款」。巴神經常失控，喺曼城兩季攞過4張紅牌；阿蘇英超生涯就一張紅牌都無攞過，但一「發市」就咬人，一咬就停賽三、四個月。咁買巴神頂多係「分期付款」，適合普遍人士負擔能力；阿蘇就係一炮過付款，無番咁上下雄厚「身家」（即球員班底，以應付隨時少個主力4個月），買前都要諗真。
咁結論係兩層樓應唔應該入市呢？學坊間樓市分析權威口脗：有實際需要，又負擔得起，梗係買啦！因為球會買球員唔似打工仔買樓，我哋要做按揭借半世糧，而且跌市、斷供仲有破產危機！如果似AC咁莫財，租住先都係選擇！最近佢哋又租咗曾經係豪宅既費托，看來AC 已成「成世租樓住」的擁護者。
文：方柏翹
NOW足球評述員