香港律師會理事會噚日開會選咗彭韻僖接替熊運信原有副會長一職，令彭成為律師會成立107年嚟嘅首位女副會長。熊運信噚日仲帶住呢位新鮮出爐嘅女副會長，以及另一位副會長蘇紹聰，齊齊去到君悅酒店會李飛。
彭韻僖原名彭雪輝，05年加入理事會。佢89年於澳大利亞新南威爾斯獲得執業律師專業資格，91年獲准喺英國同香港執業，亦有中國委託公證人等資格。
彭韻僖04年起連任兩屆東區區議會委任議員，係東區滅罪會主席、社企諮詢委員會、公民教育委員會、建造業議會委員，剛被政府委任為法律援助服務局新委員，隨時係新一代公職女王；佢亦係第十屆香港青少年軍事夏令營籌委會主席，呢個夏令營由羣力資源中心同解放軍合辦，羣力係前特首夫人董趙洪娉創立，彭律師咁幫得手，喺律師會坐多一年半載，隨時再創歷史。