高班短途明星馬莫講話出賽，就算試閘亦永遠受注目，好似呢一日（2日）徐雨石馬房嘅「神舟十號」參加泥地1200米大閘，大家都拭目以待，結果跑成點？梗係贏啦，隻馬沿途輕鬆守喺二三位，直路黐住條欄，即刻好似摩打腳咁，自動波韋達完全冇騎過撳住都贏，真係犀利，亦睇得出佢嘅狀態起得好好。
「神舟十號」原本計劃10月1日國慶盃先復出，角逐最擅長曾五捷嘅1000米直路賽，但據知家陣或提早上陣，跑開鑼日1200米特首盃，其實「神十」上季尾初跑 1200米，表現相當唔錯，直路內欄受壓下，最終只輸短頭位畀「友瑩格」屈居第二。加上123分馬「喜蓮標緻」已預告報特首盃，因此「神十」就算亦高達 111分，但預計牠在特首盃只需負121磅左右唔吃力，大大增加佢報名嘅誘因。
另一方面，對前冠軍騎師韋達嚟講，最擔心嘅係「神十」同另一短途怪獸「兵威振」如果同時報10月1日國慶盃，咁到時佢就焗住要放棄其中一隻，一定會患上選擇困難症。