社運界近年冒起唔少女神，無論係曾經參與過五區公投嘅周澄、抑或瞓身反東北同預演佔中嘅何潔泓，都有唔少粉絲。但男神呢？好似都冇乜喺社運界出現過喎；直至最近，終於有驚人新發現！
話說學聯副秘書長岑敖暉噚日朝早喺《壹錘定音》做嘉賓主持，主持人李慧玲話喎，政界一直流傳岑敖暉係「靚仔」同「男神」，問對方覺唔覺得自己係靚仔？聽到李慧玲咁問，現為中大政治與行政學系二年級學生嘅岑敖暉，即時由鏡頭前勇猛反不公義嘅社運鬥士，變身怕醜仔，佢直認係有人讚佢靚仔，但「我又唔係好覺得係」！同樣身為嘉賓主持嘅社民連秘書長陳德章，即時笑笑口話身邊嘅岑敖暉「笑得頗為含蓄」。唔通怕醜，就係呢位社運界男神最煞食之處？