法國總統奧朗德係社會黨人，上台時誇誇其談，話要向富人徵重稅，實行派福利政策，點知在野競選開支票容易，在朝執政方知找數困難，佢嘅新政策舉步維艱，法國經濟持續不振，全國失業率高達10%，佢嘅民望高速下滑，最新民意調查顯示，佢嘅民望只剩下17%，係50年來第一位法國總統有咁低民望。香港嘅CY睇到，比較之下，一定覺得自己好受港人歡迎。
奧朗德為形勢所迫，今年四月一日就委任咗一位社會黨內嘅「右派」Manuel Valls做總理，推行較「實際，輕微向右傾斜」嘅經濟政策，但同時又為咗黨內團結，華拉斯委任一位黨內左派Arnaud Montebourg做經濟部長，話係黨內大融合喎。
融合係講吓口號嘅啫，左翼經濟部長上星期公開指責法國政府執行財政緊縮政策，削減公共開支，影響民生，居然與總統總理打對台，奧朗德大怒，內閣內容不得有異見之人，立即宣佈解散內閣、重組政府，睇嚟法國將有一場左右翼思想大戰。
著名左左哋嘅美國「自由派」（即美國左派，干預派，福利派）經濟大師克魯明素來主張政府加大開支，反對緊縮財政政策，盛讚吹捧法國經濟學家皮格提嘅Capital，當然係法國左翼嘅朋友，但佢喺8月26日於INYT發表嘅專欄，卻令左丁山眼前一亮。日前左丁山提及香港樓價貴，山頂樓價特別貴得驚人，克魯明審閱美國內部移民趨勢，知道美國人口增長最快嘅州份集中於西南區，特別係喬治亞州、德薩斯州等，但呢啲州份嘅勞工生產力與工資平均低過紐約區12%-22%，點解美國平民要流向低收入地區呢？克魯明嘅結論係美國西南嘅房屋價格便宜，租金便宜，平民即使工資低啲，仍可負擔得起置業，相反，美國東北地區、紐約、加州等地房屋價太貴，租金太高，人民根本頂唔順。屋價何以高企？克魯明指係因為富裕州份有好多建屋限制，規劃限制，攞建屋批文非常不容易，故此東北與加州房屋供應相對較少，成本推高，但西南地區對建屋嘅限制好少，建屋容易，供應不絕，故此推低屋價，令人民可以安居。克魯明不經意間，講出問題所在，美國富裕地區為人口密度、居住質素、環保綠化等等因素，限制發展，限制建新屋，與我地今天的香港何其相似，政府規則與環保要求，就係一個本港樓價高企嘅結構性因素！