噚日，孫柏文參加呢個禮拜喺香港舉辦嘅Mont Pelerin Society會議。呢個講公共政策嘅MPS，歷史以來會員包括佛利民、海耶克、郭伯偉等，仲要佢哋第一次喺上世紀40年代開會傾有乜政策可提升世人生活水平同維持世界和平時，我偶像Mises仲要鬧其他包括佛利民嘅會員係「成班左膠」。
早排好期待呢次會議嘅我，問獅子山學會主席今時今日嘅MPS係點時，佢居然話已經「和理非非」，冇晒以前嗰種勇氣同遠見。聽到我都半信半疑，直至噚日會議揭幕我聽咗第一個講者講日本應該點搞。又係話要印銀紙打通縮。佢咁講唔緊要，因為講完可以俾台下隻揪個講者。
就係喺隻揪時段，我極度失望。為嗰位講者隻揪時段做主持嘅係7.8之父Greenwood，當我同Pedro Schwartz問如果通縮能整頓銀行系統，令啲已被證明不能有效分配資金嘅人同銀行家被懲罰、失業，唔係就能令識得分配資金嘅人上位，重新啟動信貸系統咩？印銀紙對啲小心冇亂來嘅人公平咩？點知，講完就俾Greenwood打發。到食晏講座時，我就見有曙光，因為講者係捷克前總統兼MPS會員Klaus。佢開波就鬧啲MPS會員：「點解你哋搞到和理非非？今時今日全球都需要人喺輿論世界抗衡要求政府干預、控制嘅聲音，你哋做緊啲乜？」堅。
4G上客不停
入正題，對上幾周我都不斷重複話大陸4G係堅料，會一鋪過追番3G嘅失誤。例如數碼通（315），喺2011年食中用戶上3G嗰浪，股價由4蚊上到差不多廿皮，如果中移動（941）有同樣升幅，由3月近「海嘯價」嘅60幾，200蚊一股會在望。咁點炒？中移當年每月初公佈對上一個月又有幾百萬上客時，中移就會升一升。而家又會一樣，每月初中移將會宣佈對上一個月又有幾百萬上4G，就會升一升。到兩百唔知幾時，升穿160蚊歷史高位指日可待。
孫柏文
獨立股評人
http://facebook.com/shuen
本欄逢周二刊出