美國男籃係今屆西班牙世界盃嘅奪標頂頭大熱，唔知係咪第1場炒芬蘭太輕鬆，所以周日對土耳其嘅第2場C組分組賽有啲輕敵，半場竟然落後5分；好彩下半場發力，最尾都以21分之差贏98:77。
上半場食蛋、搶得1個籃板咁大把嘅安東尼戴維斯（前），下半場醒神番，獨取19分；另一位內線主力法尼特亦喺下半場攞14分，兩位成為美國隊今場逆轉勝嘅功臣。美國隊周一有難得嘅1日休息，之後周二就會對新西蘭，爭取分組賽3連勝（有線62及202台今日11:25pm直播）。至於土耳其就會鬥周日輸咗畀全組最弱對手芬蘭嘅烏克蘭，今場要贏應該冇甩拖（有線62及202台今日8:55pm直播）。
B組周日亦有好戲上演，來季將會登陸NBA打76人嘅20歲克羅地亞大前鋒達里奧沙歷，比賽期間俾阿根廷嘅洛斯安尼一踭批到應一應，要出場治理。原來呢一下打甩咗沙歷6隻牙，據講呢6隻都係假牙，所以佢能夠忍痛頂硬上，落返場比賽，仲捱到完場㖭。沙歷全場射入16分同攞到9個籃板，幫克羅地亞以90:85贏波。
識睇，一定係睇足英台【英波Live】：
http://soccer.appledaily.com
http://bit.ly/engballlive