無綫電視有名你叫做CCTVB，梗係唔放過任何機會幫阿爺做宣傳機器，甚至連一年一度嘅香港小姐選舉，都緊跟進中央路線，大搞小圈子篩選。話說今年港姐以「港姐冠軍 由你話事」做宣傳噱頭，聲稱畀市民一人一票選冠軍，但實際上卻原來係經星級評判篩選後先畀市民揀，而且可選擇嘅候選人仲只得三位，最終原本好受市民歡迎嘅大熱被out，係咪好似預示緊人大框框下嘅特首係假普選呢？
大熱11號冇份入閘
前晚港姐決賽，由15號邵珮詩奪冠，亞軍同季軍分別係9號王卓淇同7號何艷娟。但賽果一出唔少網民起哄鬧CCTVB呃人，原因係無綫喺今年港姐決賽以公投選冠軍為噱頭，但實際當日原來係先由大會5位星級評判，為10位決賽佳麗喺當晚嘅表現作評分，其後篩選出最後3強，觀眾先可以透過手機程式TVB fun投票，而賽前大獲民意支持嘅大熱門、11號吳凱欣，卻被小圈子星級評判篩走，市民實際上根本冇得揀。
呢個港姐決賽結果大受網民非議，好多人話係完美演繹小圈子選特首。例如5位星級評判就係人大決定下嘅1,200人小圈子，重點功能都係篩人；而最巧合嘅就係佢哋都係篩三個人出嚟喎。咦，乜咁啱又同人大決定提委會只可以篩到最多三個特首參選人一樣嘅？
而港姐喺經過篩選後，冠軍雖然由邵珮詩以15.6萬高票當選，但有網民質疑佢嘅認受性，認為如果賽前大熱、11號吳凱欣都可以出閘，賽果就唔會係咁！咁又難怪網民批評港姐同特首選舉一樣，直指人大通過嘅框架都係排除民意代表，普選都變得冇意義，有票都唔一定要㗎！
而24歲嘅邵珮詩噚晚接受無綫新聞訪問時，堅持由評判團選出最後三強後再畀觀眾揀有認受性：「因為以前全部都係評判選出，今年係評判選出，跟住觀眾投票選頭三名，我覺得咁係好公平。」佢之後話喎，知道好多人想一人一票表達民意，「但我認為個個都要學識點樣包容，點樣可以有一個共識」，強調適當嘅包容對香港社會好重要：「我哋香港人一定要團結，我哋都是一家人。」睇到呢度，八方相信佢喺無綫呢個河蟹大家庭一定有運行。通訊局收到6宗對港姐決賽嘅投訴，包括投訴挖苦別人、鼓吹着皮草，引致不良社會風氣、賽果不公，有造馬之嫌同內容沉悶。
李八方
mailto:[email protected]