代言人嘅名氣好壞，往往影響到產品嘅聲譽，有網民笑指成龍大哥係「代言死神」，佢代言過嘅好似霸王（1338）、中國禁毒運動，幾乎個個都無功而返。大陸飲品生產商天喔（1219），最近搵咗當紅韓星李敏鎬做代言人，邀請一班分析員同投資者率先參加聽日嘅新產品發佈會。
李敏鎬將會代言天喔果味茶產品系列，公司仲搵埋韓國著名導演MC Park，拍咗一條全新廣告片。天喔上月底向香港分析員同投資者發出邀請書，邀請佢哋參加聽日喺四季酒店舉行嘅產品發佈會，到時李敏鎬、MC Park同天喔主席林建華都會出席。
查實，天喔真係有鋪「代言癮」，舊年上市嘅時候，佢哋就搵咗歌神張學友代言炭燒奶茶，仲話學友要親自睇過工廠，先肯代言產品。唔知李敏鎬今次又使唔使參觀果園呢？