今季以全新形象示人嘅AC米蘭，由型仔主帥恩沙基領軍下，喺周日意甲旗開得勝主場3:1擊敗拉素，新球季旗開得勝。A米打得又睇得，場邊一樣大把嘢睇，恩沙基激情十足；落實加盟嘅費蘭度托利斯（費托）亦帶埋老婆仔女嚟打氣，加埋昔日舊將馬甸尼同舒夫真高都有嚟捧場，夠晒睇頭。
響頭炮3:1挫拉素
A米喺新一季意甲首戰喺聖西路對住拉素，日本中場本田圭佑喺7分鐘就先開紀錄，易邊後蒙達利同新兵文尼斯各建一功；另一新兵阿歷士洛里高都有波入，不過係擺烏龍令拉素喺67分鐘追成1:3。到補時另一A米新球員、門將迪亞高洛迪古斯撲出12碼，主隊順利全取3分。
恩沙基喺今夏接手執教A米，佢嘅魅力都非同凡響。昔日戰友馬甸尼同舒夫真高都有嚟聖西路捧場，令呢場比賽更顯星味。至於另一型男費托，就已經喺賽前完成咗借用兩年嘅轉會，今場波未可以上陣，就喺貴賓席睇吓新隊友嘅表現。
費托着住黑色T恤到場，坐喺老闆貝盧斯科尼同副主席加利安尼前面，佢亦好識做，同佢仔女準備咗A米波衫着住打氣，希望佢去到意大利會有好發展喇。
費托馬甸尼軍刀捧場
着住筆挺西裝督師嘅恩沙基，喺比賽開始嗰陣都仲好冷靜咁坐喺場邊。當本田先開紀錄，佢仲忍得住只係同身邊職員慶祝；到下半場入第2球就頂唔住要爆發，衝入球場同班球員慶祝埋一份，搞到要畀旁證警告。有啲時候如果主帥可以將激情注入球隊，感染到班球員，就往往可以踢高一皮。
除咗費托之外，A米喺球員轉會市場關閉前再添新兵，再由車路士借兵，羅致荷蘭中場雲堅基爾。加利安尼真不愧係免費達人，𠵱家A米可以排出一個打得吓，但全部係借用或者免轉會費簽入嘅11人正選陣容，今季有咁多球員加盟，但埋單都仲有錢淨賺，如果喺型帥恩沙基帶領下仲有好成績，咁就真係完美。
識睇，一定係睇足英台【英波Live】：
http://soccer.appledaily.com
http://bit.ly/engballlive