反動基地油麻地活化廳，近年中秋都會搵街坊餅店整「革命月餅」義賣。活化廳近年俾藝發局斷糧，今年自然要「賣餅籌旗」，持續作戰啦。眼見人大封殺真普選、佔中在即，活化廳一班藝術家響應政府話「想變？」嘅口號，做咗一款「活化餅」畀大家「袋住先」，個月餅模係同上年一樣，月餅皮上會印上「有得揀」，有三個款式，分別係「有得揀」、「有得揀」，同埋「有得揀」。佢哋話，今年個月餅係由藝術家人手製作，裏面嘅材料可能係蓮蓉、蒜蓉又或者係薑蓉，又可能係月餅內藏紙條，話你知佔中時間，抽到邊款，都唔到你揀。呢個咁吸引嘅月餅，家陣賣80蚊個，收益會撥捐活化廳長期運作水電煤基金。