【港女爭萬金之乜都唔識】港女愛打扮但唔愛打掃，愛上網但基本時事常識近乎零蛋。日前有線《十萬蚊港女大翻身》9位港女參加3日2夜生活集訓，當日十蚊港女Hannah（溫芍遙）洗廁所時，地下竟然出現咗一張有真便便嘅廁紙，有人便便之後將廁紙亂丟，認真污糟邋遢。現場當然冇人敢認係「經手人」啦！
除咗唔識執拾同污糟邋遢之外，港女嘅時事基本常識真係低到不能再低。問Hannah林鄭月娥同曾俊華係邊個，佢話唔知，仲反問林鄭係咪議員。馮仁昭之後將澳門特首崔世安、香港發展局局長陳茂波同警務處處長曾偉雄嘅相畀港女金金、Ruby同Lia認，結果只得金金認得崔世安，其餘全部唔認得，真係勁到冇朋友！
「劉德華就投票」
另外，Inn Lee、Michelle、馬楚嵐、Omi同Jasie 5位港女日前喺汀九沙灘接受訪問時，話唔識政治。Omi話：「有次俾人問我財政司司長係邊個，我好似講林鄭月娥。我對追娛樂新聞更加有興趣。」Jasie亦話：「普選？劉德華我就一定會投票。」
當日5位港女喺沙灘打排球嬉戲，睇落好融洽，Jasie表現又親切又體貼照顧其他港女，點知Jasie係是非精，俾其他港女背後鬧爆作狀扮嘢兼刻意搶鏡。
撰文：馮仁昭