女神tea time:母憑子貴的翻版 - Fifi

女神tea time:母憑子貴的翻版 - Fifi

台灣最近成日講「台北香港化」,話樓價、舖租好似香港咁越來越高。以港人每到台必食嘅鼎泰豐忠孝店為例,今個月14號就會關門大吉,改進駐新光三越南西店,傳聞不續租係因為租金太高。
講返股,之前高振順表演財技,瑞東(376)以超低價買入英發(439)股份,結果母憑子貴下瑞東勁升。想喺市場上搵翻版,保興(1141)可能係其中一隻。翻查股權披露,保興於今年7月公佈持有中國微電子(139)16.23%股權,約3億股。呢批股份相信係7月初中國微電子以0.145元配股時認購。
中國微電子自7月底勁升,單係呢批股份已獲利7倍,賬面賺2.67億元;之後又分別三次增持,賬面再賺多7,780萬元,前後加埋約3.4億元,每股買入均價只不過係0.208元,正正就係中國微電子勁炒前個價位。所以話保興係完美食足中國微電子呢個5倍升浪!保興亦持有近期投資大賺嘅HEC Capital約4%股權,後者亦為中國微電子股東,持股約6%。股價自7月以來,都冇乜點郁過,足證其投資可觀利潤未反映於股價上。保興大股東是善於投資殼股的孫粗洪,旗下新洲(377)就賣咗,另外百靈達(2326)佢亦減持,呢期賣嘢意欲咁強,又令保興多一個殼股光環。保興噚日升咗8%,破埋0.38元高位之後,真係風光秀麗。

Fifi
http://www.facebook.com/lovefrystock
本欄逢周二、四刊出