順誠（531）單係計啱啱公佈半年度成績單每股派息，已經挨近6厘，預測全年息率，高達11厘。而集團主打家具業務，食正外圍好景，有得博佢大翻身，順誠隨時一放絕塵。
順誠主打嘅木製家具業，以歐美市場為主，集團兼透過「Lacquer Craft Hospitality」品牌，拓展酒店家具瓣數。據統計，家陣祖國商務外遊規模，已達1.6萬億元，估計七年後，會大幅增長40%，至高達2.2萬億元。又幾年後祖國中產人數，亦將由家陣近3億人，倍增到6億人。祖國多豪客，激發全球酒店投資熱。
順誠食正歐美復蘇
事實上，第一太平戴維斯亦發表報告講，中港投資者喺未來三年，投資英國酒店金額超過23億元。
睇到係，順誠唔止食住歐美經濟復蘇，嚟緊日子，酒店家具呢一瓣，係大茶飯，順誠若果順風順水，嚟緊幾年，業績會好爆炸。
順誠最新半年度純利4,221萬元，增長28%。雖然，純利增長涉及投資增值因素，但係順誠最新半年毛利率，就去到27%，比上年同期26%有改善。順誠優化產品組合同成本控制，已經睇到成績，加埋好似上邊提及歐美市場好番，環球酒店投資熱，順誠又與環球知名酒店品牌合作，食得應，今年已經唔使憂，全年keep番派息0.12元，息率回報，挨近12厘。
又順誠現價（1.05元）比2005年上市價2.75元，潛水60%，喺八年低位，乜都反映晒，業績一翻身，隨時放紙鳶。呢轉買順誠，先當翻半番到1.58元計，到時，息率回報仍然高達7.6厘，而PB仲係得1.3倍，有排未到行家敏華（1999）兩倍水位。
錢雋
細價股專家
本欄逢周二、三、五刊出