DIY通識：舊Tee變貓竇

做貓奴一定要有手尾，收衫後胡亂放床尾，隨時變成貓毛刷或貓爪板！通常呢個情況下，就會有句說話湧上心頭：「件衫唔使要喇！」咁就啱喇！你可以將佢DIY成得意貓竇，好處係設計一定合你style，而且材質一定合時令季節；今次示範用的行山透氣tee，就做出唔焗疏氣貓竇效果，如果冬天你的羽絨大褸成了爪下亡魂，亦可換裝成保暖super warm貓竇，基本DIY時間約需半個鐘，設計與街邊貨絕對不一樣。
攝影：伍慶泉
貓模特兒：哥哥

材料：
舊tee、舊地毯、15×18吋木板、30吋長粗身鐵線、4分螺絲9粒（連絲帽）、雙面膠紙、膠索帶2條、膠腳４個

工具：
電鑽、釘槍、各類鉗子

小貼士：
材料中最貴可能是木板，不過一般木行門口都會有碎料木材，買差不多尺寸即可，市價約$10至$20。

1.在木板四個角約半吋位置鑽出對穿的小孔，邊緣貼上雙面膠紙，放上舊地毯再用釘槍固定，製成床面。

2.兩條鐵線分別屈成半月形支架，一邊屈出耳仔位，從木板底部穿入在對角位穿出，再做耳仔位。

3.用螺絲、絲帽固定耳仔位。

4.營幕支架頂部的十字位，小心用兩條膠索帶固定。

5.將舊tee套在支架上，多出部份反入底部，用釘槍固定。底部釘位要加裝螺絲膠腳，以免刮花地板。

肥通點評

最近家中小貓經常伸脷，獸醫說是有點過熱問題，買了吸熱墊牠愛理不理，需知貓貓最愛捐窿捐罅，所以用爬山透氣tee做貓竇；結果貓貓極之喜愛，可能用了主人的衣物，令貓貓感到親切。