建制派內蛋散一大堆，個個瞓身為中央賣命博上位，但就算喺香港獲得西環賞識，當中實際上位又有幾多個，真係獲得京官另眼相看呢？
八方相信，至少民建聯嘅新界東立法會議員葛珮帆，未夠知名度打入京官愛將流行榜，事關專程南下宣旨嘅全國人大常委會副秘書長李飛，都似乎唔識佢係乜水！
同劉迺強最friend
話說李飛噚日朝早喺機場博覽館搞宣旨大龍鳳，建制派晨咁早仆入機場向中央示好，唔少人都想中籤獲發問機會，證明到此一遊撐場！
話說噚日獲抽籤提問嘅前三位建制代表，分別係基本法委員會委員劉迺強、工聯會會長林淑儀同葛珮帆。當政制及內地事務局局長譚志源抽出劉迺強提問時，李飛回應時以迺強相稱，答完後更問道：「迺強委員我說得對嗎﹖」
但輪到抽到葛珮帆嘅問題時，就算譚志源已經讀出葛珮帆個名，李飛望完發問字條卻自嘲中文水平比較差，看不清楚提問人嘅名字！據聞唔少在席建制派中人笑笑口，話反映李飛心目中，根本冇葛珮帆呢個人，否則點會喺譚志源點名後都話唔知提問者係乜水吖！