阿里巴巴創辦人馬雲一向自嘲土豪，話說佢早前攞咗2,000萬人幣做「男人獎」，不問賽果打賞FC廣州（恒大）球員，不過事與願違，球隊最終喺亞冠盃八強止步，衞冕失敗。之後唔少內地體育傳媒就睇死馬雲，話佢嘅銀彈策略唔會搞得起中國足球，搞到馬雲噚日撰文反擊，話自己仲未正式開始落手落腳搞足球，「沒有錢肯定起不來的」。
佢仲拉埋恒大（3333）老闆許家印落水，話佢係出錢嗰個都冇心痛，其他人唔應該指指點點「瞎起哄」。公道講句，馬雲呢排應該幾忙，要處理阿里美國上市，又要周圍飛去搞上市路演，可能真係未開始投入搞足球嘅。而且出錢有時都可以帶起一隊波，英超嘅曼城、車路士，法國嘅巴黎聖日耳門當年都係用金權足球起家，話唔定中國足球真係未絕望呢。