肥佬黎在今期「壹週刊」講「你無恥」，文末提及有某報派人跟住佢日跟夜跟。跟得咁足，當然係希望有嘢爆，做狗仔隊好辛苦嘅，日夜守候目標人物，不敢鬆懈，枯燥到極，大小二便如何解決，已經係頭痛問題，加多利山噃，去邊度搵公廁呀，天氣咁炎熱，坐在採訪車中，如真係守法律要停車熄匙，焗桑拿都冇出咁多汗。
左丁山未曾做過狗仔隊，不知實際苦況，憑想像已經打冷顫，亦都唔想知得太多。香港狗仔隊創始人之一，就係當今「明報」編務董事呂家明，24年前佢在「壹週刊」負責時事組，就用呢招挖到唔少新聞材料，左丁山舊年問過佢如何指揮、派遣狗仔隊，佢就話：「邊度講得咁多呀，你都唔會做㗎啦！」
日企夜企之下，廉署人員8月28日晨早七時就到肥佬黎大宅拍門，原本以為拂曉出擊，點知有人更早在場，見機不可失，即刻連環拍照上網，全港記者好快就趕到門口聚集，迅速令廉署到訪黎智英一事，成為世界性新聞，8月29日「華爾街日報」好唔客氣，頭版新聞標題係"Beijing Raids Hong Kong Homes"，第五版標題係"Beijing Searches Hong Kong Critics' Homes"，第七版社評標題係"Beijing Gets Ugly in Hong Kong"。明明係ICAC人員搵黎智英、李卓人、Mark Simon嘅噃，點解「華爾街日報」係要用Beijing，不用ICAC？其中自有深意，而香港ICAC梗係會否認佢地等同「北京」嘅啦。
香港冇法例管制政治捐款，左丁山問過幾個朋友律師，佢地都話「捐款無罪」，故此呢件事情有何複雜耐人尋味之處，只能留待法庭開審之時，控辯雙方講內幕，不過目前又難以預期呢件事會唔會釀成官司噃。左丁山碰到一位美國人，佢話睇完南早、華爾街、FT嘅新聞報導之後，有一個粗略印象，就是「Jimmy Lai is being persecuted, not prosecuted」，左丁山笑佢玩弄字眼，佢就話：「In politics, perception is everything」，又係嘅，在政改方案最後關頭，敏感時刻，廉署完全冇政治敏感度（廉署素來堅持佢地遵從呢一點），採取行動，點都會激發無限遐想嘅嘞。