拜仁慕尼黑喺前晚作客史浩克04，雖然有沙比阿朗素新登場，但唔知係咪開波前俾主隊條裝修成礦洞嘅球員通道嚇親，最終慘被逼和1:1，開季頭兩場聯賽取得1勝1和。
拜仁慘被逼和1:1
拜仁上周五落實由西甲皇家馬德里簽入沙比阿朗素，隨着喺上周六場德甲派呢位32歲前西班牙國腳中場落場，佢仲着起3號波衫㖭。呢場波佢哋有個好開始，喺10分鐘由前鋒羅拔利雲度夫斯基接應中場施巴斯坦洛迪妙傳近門射成1:0，可惜唔可以將勝果維持到最後，喺62分鐘俾主隊後衞賀維迪斯射入而被逼和1:1。不過由電視重播所見，賀維迪斯嗰球個波係彈中佢隻左手入網，幾可肯定係手球，但係球證睇唔到判入球有效，咁就搞到拜仁唔見咗兩分，兼令沙比阿朗素唔可以喺自己場德甲處子戰幫球隊贏波，慘做黑腳。
拜仁教練哥迪奧拿話：「我認為我哋頭20至25分鐘打得好好。喺呢啲高水平比賽，你要喺比賽過咗25分鐘之後，仍然保持控球權，但好明顯我哋做唔到，呢個就係問題所在。」
主場通道變礦洞
史浩克成功喺拜仁身上搶到分，除咗有球證幫手之外，似乎仲同佢哋喺主場做咗手腳有關。由於佢哋位於嘅城市蓋爾森基興係以採礦業為主，所以被認為係屬於礦工嘅球會，因而有「礦工」嘅外號。今季，佢哋就將韋爾廷斯球場內嘅球員通道，裝修到好似礦洞咁。佢哋有咁嘅構思，一來係想提醒自己球員，佢哋同當地嘅勞動階層心連心，二來係想營造陰森嘅氣氛，令對手有不安嘅感覺。唔知拜仁班球員係咪俾呢條礦洞通道嚇親，搞到贏唔到波呢？
識睇，一定係睇足英台【英波Live】：
http://soccer.appledaily.com
http://bit.ly/engballlive