全國人大常委會決議將9月3日定為中國人民抗日戰爭勝利紀念日，特首狼英日前亦擦鞋跟從。噚日民政事務局局長曾德成則喺網誌以〈牢記歷史，珍愛和平〉為題，表面話抗日勝利大讚中華民族堅韌不拔，實際卻似乎想藉歷史反映特區政改有惡勢力入侵，暗示「有一股勢力就張牙舞爪起來」。嘩，佢唔係講緊偲嫣BB或者張融啩？冇理由同八方心靈相通啩？
德成局長喺網誌話，1945年9月3日日本遞交降書，第二次世界大戰結束，呢日亦係全世界正義力量戰勝德意日軸心國邪惡力量嘅紀念日；回顧世界近代史，呢一日係重大轉捩點，仲話香港嘅經濟奇蹟，都係戰後恢復和平開始醞釀嘅。
有泛民口痕友睇到呢度，話篇文有啲唔對路，尤其係中央近期將佔中抹黑為搞亂香港嘅惡勢力之際，曾德成肯定意有所指！睇埋後面，大家心中有數。曾德成話喎，「正義戰勝邪惡」係歷史長河巨浪之所向，冇人能夠抗逆，而「邪惡勢力不會在地球上徹底消滅，在一定的因緣之下，會竄出來囂張一番。近一段日子，有一股勢力就張牙舞爪起來，製造地區緊張」。
雖然佢嘅結論係話此舉證明人大嘅決議好有意義，但唔少泛民中人覺得佢講緊政改，笑笑口話好認同係有邪惡勢力入侵，佢哋咪打住正義招牌反佔中嘅偲嫣BB同張融囉，唔知德成局長肯唔肯幫市民驅邪捉鬼？
李八方
mailto:[email protected]