富豪都唔一定淨係喺中環、金鐘行街或者只係幫襯高級食肆，「鋼鐵大王」龐鼎元兒子龐傑噚日下晝就同做過藝人嘅靚老婆郭秀雲喺深水埗行一轉，行到口乾仲齊齊喺鴨寮街一個檔口等買蔗汁。
龐傑冇乜架子，佢話自己本身唔鍾意去深水埗，但係跟老婆去過之後，又覺得好新奇，好似好多嘢睇咁。現場見佢哋兩個拍拖咁周圍行，唔似有保鏢跟身，龐傑一身T恤、鬆身褲，一般人行過佢身邊，真係未必知道佢嘅身份。
龐傑向來低調，ball場都好少見到佢蹤影，反而今年初佢同郭秀雲出席一個爵士豎琴音樂會，龐傑就有為郭秀雲上台彈結他伴奏一首英文歌，咁先至稍為高調現身。