滙源果汁（1886）主席朱新禮舊年7月中突然辭任執行總裁，搵來美國上市公司金寶湯亞洲區前總裁蘇盈福接任，話要將間公司國際化，點知今年5月就傳出蘇盈福權力被架空，朱新禮當時仲拿拿聲出來否認。但紙似乎包唔住火，公司噚日宣佈，蘇盈福辭任總裁，將於今年10月1號開始轉任主席特別顧問。
滙源冇解釋蘇盈福為乜做咗13個半月就辭任總裁，只係話佢將會擔任主席特別顧問，協助主席發展公司國際業務同埋制定營運策略。但喺財經界，轉任顧問通常都係高層同公司好來好去嘅做法，唔使話即刻拜拜咁突然。2000年加入滙源嘅于洪莉就會升任執行總裁。
同時，朱新禮位37歲千金朱聖琴即日起加入董事局做執董，佢1996年加入公司，做過多個部門。今次人事變動後，公司嘅家族色彩更濃。