喺香港政局風雨飄搖之時，《明報》嘅編務董事呂家明日前專程返嚟香港坐鎮，順道同香港《明報》員工一齊「作戰」，真係聞者都覺得「窩心」！但呢頭呂家明返咗香港，嗰頭輪到佢主理嘅加東版發生大件事。話說有《明報》香港員工發現，佢哋喺8月30日見報、一篇題為〈佔中明晚添馬集會宣布抗爭 民陣發動繫黃絲帶表不滿〉嘅文章，喺加東版出現時，竟然俾人既改題又改文。
八方都專登睇吓，加東版究竟搞邊科，除咗大題突然變成「佔中啟動 被定性推翻政權」，搞到佔中好大罪咁，內文亦有好多涉及全國港澳研究會會長陳佐洱接受傳媒訪問嘅內容，但喺原先嘅文章入面，呢啲內容係冇㗎喎，明顯係後加啦，咁又難怪有《明報》員工大鬧好離譜，叫加東版咁叻就自己去採訪！