演唱會之父張耀榮於今年3月在家中猝逝，一連兩場紀念「演唱會之父 榮耀紅館show」前晚假紅館開鑼，群星星光熠熠悼念，陳慧琳（Kelly）演繹《誰願放手》時有男fans衝上前送花，緊捉着她的手不放想合照，拉扯間Kelly大叫救命；她忍淚悼念耀榮叔：「張生係一個好好嘅人，我入行得兩年，佢好大膽支持我喺紅館開個唱。」
葉蒨文感激邀請來港
耀榮叔和沈殿霞生前是好友兼鄰居，鄭欣宜回憶與Uncle張的趣事說：「媽咪做嘢好忙，我成日喺張家飯枱黐餐，Uncle張驚我怕醜不停問我啱唔啱食，當時6歲嘅我就話：『Uncle張唔使咁客氣，你求其畀啲鮑魚蟹黃翅我食就得喇。』Uncle張笑到眼都矇埋。」至於跟耀榮叔相交多年的歌手更感觸，葉蒨文說：「係張生請我嚟香港，佢次次都要坐喺同一個位，我相信今晚佢都係同我哋一齊。」容祖兒演繹《越唱越強》後鞠躬說：「好多謝耀榮叔做咗一個咁好嘅平台，令香港歌手可以演出同發揮。」
擔任壓軸的張學友送《愛是永恒》給耀榮叔說：「雖然張生離開咗，但佢為歌手、樂壇做嘅一切，大家都會記得。」
關菊英揀唱爭產劇歌
而關菊英揀唱爭產劇《溏心風暴》主題曲《講不出聲》，剛巧耀榮娛樂因兩房官司可能結業，菊姐離去時受訪說：「首歌係大會提議，自己都覺得適合，張生鍾意煲劇。」記者指劇集講爭產，她恍然大悟說：「我冇諗到，對唔住，純粹唱歌紀念張生，冇留意新聞。」對於耀榮王國可能沒落，她表示不作評論，張耀榮太太和親友離開時拒受訪。祖兒則表示演出很感動，更提議在紅館後台豎立張生銅像作紀念：「雖然今晚張生唔能夠實體出現，但精神永遠支持我哋，建議幫張生做銅像放後台走廊。」
採訪：譚倩宜、盧妹
攝影：仇志德
「榮耀紅館show」曲目
1. 鄭秀文《終身美麗》
2. 甄妮《愛定你一個》
3. 甄妮《明日話今天》
4. 側田《Kong》
5. 側田、倫永亮、陳潔靈《沙沙的雨》
6. 陳潔靈《千個太陽》
7. 倫永亮《心仍是冷》
8. 葉蒨文《完全是你》
9. 葉蒨文《福氣》
10. 蘇永康、梁漢文《激光中》＋《無心睡眠》＋《夢伴》medley
11. 蘇永康《越吻越傷心》
12. 梁漢文《七友》
13. 鄭欣宜《擁抱愛》
14. 草蜢《華麗舞台》
15. 草蜢《我們》
16. 陳慧琳《誰願放手》
17. 陳慧琳《最愛演唱會》
18. Mr.《如果我是陳奕迅》
19. Mr.、吳雨霏《愛是最大權利》
20. 吳雨霏《我本人》
21. 關菊英《講不出聲》
22. 關菊英、鄧健明《兩忘煙水裡》
23. 容祖兒《越唱越強》
24. 容祖兒《痛愛》
25. 五月天《突然好想你》
26. 五月天《乾杯》
27. 張學友《還是覺得你最好》
28. 張學友《愛是永恒》